PROGRAMMES TV, événements, nouveautés...

Suivez les grands événements et nouveautés de Polynésie la 1ère !

[VIDEO] Voeux 2019 du Président de l'Assemblée de la Polynésie française, Gaston Tong Sang (en tahitien)

Les voeux du Président de l'Assemblée de la Polynésie française en langue tahitienne.

© Assemblée Polynésie française
© Assemblée Polynésie française
  • Polynésie la 1ère
  • Publié le , mis à jour le
 Hoa here mā, ia 'outou e te mau 'utuāfare nō Pōrīnetia, 'ia ora na i roto i te aroha o te Atua.

'Ua fa'a'āpīhia te mau ti'a mā'itihia i te 'āpo'ora'a rahi i te 'āva'e mē nō teie matahiti. Nā roto i tō 'outou hina'aro 'e tō 'outou ti'aturi, 'ua ti'a mai te tahi pae rahi pāutuutu maita'i, arata'ihia 'e tō tātou nei Peretiteni, 'o Edouard FRITCH tāne. 

Mai tō mātou manara'a mai 'ei ti'a mā'itihia i te 'āpo'ora'a rahi, 'ua amo pāpū mātou, te mau mero o te pae rahi, i tō mātou ti'ara'a, mā te māna'o hō'ē 'e te itoito, i piha'i iho i te fa'aterera'a o te fenua, nō te tāvinira'a i te huira'atira. 

'Aita ato'a ho'i e mo'ehia ia'u i tō mātou mau hoa nō te pae pāto'i o te fa'aitoito nei i te pa'epa'era'a i tō rātou hi'ora'a poritita i roto i tā mātou mau mātutura'a. Te 'oa'oa nei au i te 'itera'a i te mana'o fa'atura i roto i te tahi 'e te tahi. O te huru ho'i teie o te fa'aterera'a hau manahune. 

I teie matahiti, 'ua fa'ati'amāhia 'o Pouvanaa a Oopa. 'Ua fāri'i-poupou-hia teie nei fa'aotira'a 'e te mau pupu poritita ato'a o te fenua nei, 'e tae noa atu ho'i i te tā'āto'ara'a o te nūna'a nō Pōrīnetia farāni. I mua i teie nei fa'aotira'a tīa'i-māoro-hia, 'ua tu'u tātou i tā tātou mau 'amahamahara'a poritita i te hiti, 'e 'ua fa'a'ite i tō tātou hō'ēra'a nō te ha'amana'ora'a i te parau nō tō tātou nei Metua ia Pouvanaa a Oopa. 

'Ia arata'i teie nei hō'ēra'a i tā tātou mau tāpura 'ohipa ato'a. 'Inaha, 'ua riro tō tātou nei fenua, hō'ē ā tō na rahi 'e 'o Europa, 'ei vāhi tīpaera'a nā te mau nūna'a huru rau o te ao nei, 'ei māhora fāri'ira'a i te mau hīro'a tumu 'aore e hi'ora'a, te Mā'ohi, te Papa'ā, te Tinitō 'e te vai atu ra ā. 

I teie mau mahana 'ōro'a, te ha'amana'o nei au i tō tātou mau taea'e 'e tuahine e pārahi ra i roto i te hepohepo 'e te māuiui. Ia 'outou e te feiā 'ōvere 'e te nava'i 'ore, ia 'outou e te feiā mau 'āuri, 'ia 'outou pā'āto'a 'e te mau 'utuāfare o tei ro'ohia i te 'ati ma'i 'e te 'ati pohe, 'a fāri'i mai i te mana'o fa'aitoito 'e te tāpa'o nō tō'u here ia 'outou. 

'Ua 'ite tātou i te mau fifi rahi tā te 'ava 'e te 'ava'ava ta'ero e fa'atupu nei i roto i tō tātou orara'a va'a mata'eina'a 'e i roto roa i tō tātou mau 'utuāfare. Te pi'i atu ra vau ia tātou pā'āto'a ē : 'A ara i mua i teie mau tao'a 'ino, 'ia 'ore tō tātou mau 'utuāfare 'ia topa i roto i te 'ati ! 

Tō'u mau hoa, 'ia vai noa te 'oa'oa i roto ia tātou 'e 'ia maita'i noa 'outou i te pae o te tino nō teie matahiti 'āpī. 'A tāpe'a ana'e tātou i te mau 'ohipa maitata'i ato'a o teie matahiti 'ei fa'a'oa'oara'a ia tātou i teie matahiti 'āpī. 'Ia ha'atīhia 'outou i te here o tō 'outou mau fēti'i 'e tō 'outou mau hoa. 'E 'ia 'ōpere 'outou i teie here i te mau vāhi ato'a. 'Ia tupu tō tātou mau hina'aro 'e 'ia ti'a tā tātou mau 'ōpuara'a. 

"'Ia ora na i teie matahiti 'āpī 'e 'ia ha'amaita'i mai te Atua ia tātou pā'āto'a ! "
Tahiti Informations

Alerte infos polynesie tahiti

LES HORAIRES :


CINEMAS DE TAHITI :

 
INFOS PRATIQUES :

 

vos programmes tv