réunion
info locale

FONNKÈR : "Bordèz zarlor" de Gwendoline Absalon

Fonnker
Gwendoline
Retrouvez chaque samedi, un fonkézèr de l'île des poètes.
BORDÈZ ZARLOR
ne faire qu’un avec la vie.
savoir la prendre par la main et l’emmener la ou veut.

I- mazinn azot in fonnkèr
Mazinn azot in domin in fonnkèr dann zot min
Selman apré zot sora paré    
Pou mazinn kélèr é pi kèl lèr lé bon pou zot
Na pa sanpass la mizèr
Na pa sanpass lérèr non pli mé pangar
Pangar dann vwayaz la zot lam i larg sanm lo diab
Parsk sa marmay, sa, ryink azot i koné
Ii- lo kèr, li lié konm lo ronm pou lo kor
In kor an, koman i di, in kor an sapoti zot i wa
Konmsi kap kap, kap kap an bandé telman for zot i domann
Pou kony si sati
Fonnkèr la i trap azot dann dwad’pié la
Konm piéd’bwa, anrassiné é pi li mont, li mont, ziska dann kèr
Sa lé landrwa lo pli zinportan marmay
Landrwa lo pli sakré, lo pli gran, lo pli zoli
Li mont, li kontinié monté ziska dann koko
É fonnkèr la, lié kap fé danss azot, zot i koné?
Lié kap fé shant azot tank na pou shanté
Danss azot tank na pou danssé
Koz azot tank na pou kozé
Esk zot lé paré marmay
Paré pou fann mandoz
Esk zot lé paré pou zwé sanm kossa in shoz
Mé avan sa mi sa di azot in zafèr
Kan zot wa trouvé zot sora konm koumbla
Koumbla, dovan zot lespri zot wa zwé tabla ek la vi
Iii- mazinn azot astèr dann vant in monmon
In monmon i apèl la tèr
La tèr la, lié telman gran k’bondié na la plass pou dor anndan
Si la tèr la na in ti péi i apèl bordèz zarlor
Esk zot néna shapo si la tèt marmay
Esk zot la finn mèt linz blan si zot
Si zot la pankor, mèt ali, oubli pa zot savat dé dwa
É pi, zot i wa bertèl zot la mèt si varang la
Avan alé, trap ali souplé
Mé rorant pa dar kaz avek, ryink avan alé
Mèt ali si zot do é nou sava
Si li lé lour alor panss ali an koko lo kèr
Koko lo kèr li, in bonbon an siro domièl
Lé bon? la port, tak také?
Nou sa bat in karé si bor la mèrpou dévid in kou nout bertèl
Poz ali ziss koté zot
Iv- li lé nwar, amèr, konm in gou kafé granmatin ek maloy dann zié
Sa sé la pèr ek lorgèy marmay, zèt ali
Li lé dé koulèr, zonn vèr, an bouyon larsson dann boutèy
Sa sé manzé pou nout lam, alor manz ali tank zot i vé
Publicité