FONNKÈR : "La Brèz Dann Karo Koton" de Socko Lokaf

Réunion la 1ère •

La Brèz Dann Karo Koton 

La bouzi la pokor fonn po sak la fine défin,
Dann mwa avan mwa zavan la mazi mazinasyon la kapay amwin.
An vavangaz, an maronaz la pansé.
An romazav,an zanbrokal,an kabaré.
Virétourné dann koko,
Démayaz la lang, lyanaz lo mo.
é la in vwa, in kozman, in nafèr.
In finnvi dann fonnvèr, in féklèr, in fonnkèr.

Té ki di :

Si fo lévè Done na lévè.

Mé lèv po kisa ? lèv po kosa ? Po sak la pa kap kozé ?
Po sak pa kap détak baro la bous po zot langkozé ?
Angouyav la ras, fransizasyon lo zistwar.
Konbyin lo san mon péi ros volkan la bwar ?
An lon, an larz, an travèr.
Bon pa bon,dovan déryèr.
Nou gob tout simagré lot koté la mèr
Po rod kèl koté ton san lé klèr.
I pinn dépinn po tir défo.
Koulèr i détinn po myè tinn lo zo.
Dopwi tanti i di koman fo kourb lo do
Po myè kasyèt la ont sou mon sèt kouvèrtir la po.
Libèrté ? mé kèl libèrté ?
Ras libèrté la ! Réyonèzté la fine ariv konm in vyé rèv.
Byin gayar lo zoli fransé i robonb si lo bor lo baba la lèv.
Lé taktaké lo langkozé. La di amwin Kaf kal out kolèr, kal out mo.
Mé tank gro blan va tyinbo la bar Kaf va fé lo ta dann kalbato.

Si fo planté, Done na planté.

Zot karo larzan mon karé la tèr.
Konbyin pint do ri po zot zabo vaza san lo fon.
Kisa i giny kourone lèrk I désot la mèr?
é kréol kouyon kalkil ankor mové mèt bon patron.
Oukilé lo bousé manzé la tèr lé kap done?
Non ! Fo plant la kane po zot fane do sik dan zot tas kafé.
Lalkol rolizyon mon péi. Nout lobénit i apèl ronm sharèt.
Tank na plant kann po fé do sik gramoun va mor sanm la diabèt.

Si fo fout do fé, Done ma fout fé

Ziskakèlèr lannmin moun mon tèr sé gèt atèr ?
Méyèr mwayin may sanm domin sé kri ayèr méyèr.
Zistoman zot tasmannir ké nou viv zis konma.
Ziskakèlèr zot bonvoulwar va fé la lwa mon lèstoma.
Fénwarsi lo tan zèsklav.Fénwarsi lo tan zangazé.
Po in zarboutan in lot san. Po in zansyèt zyé blè.
Toulézour dann zournal, toulézour dann radyo,toulézour dann télé
I soubatkoz po débatardiz nout san konyé.
Ziskakèlèr makot va fé mont amwin la propté ?
Fo zot fanal i flanm po niabout fé tinn la not.
Zot viv ansanm sé viv konm zot.
Zot Bon Dyé, Zot lwa, zot zistis, zot sou.
Sak ta nou ta zot, sak ta zot ta pa nou.
Mon raz in mové rèv po bon pé d’kouyon.
Mon raz in mové rèv po bon pé souyon.
Mon raz in mové rèv po tout lo pé d’kolon.
Amwin minm la brèz dann karo koton.
 
À la une
Voir plus d'info
Thématiques associées