FONNKÈR : "Déryèr Saryo" de Eric Naminzo

Retrouvez chaque samedi, un fonkézèr de l'île des poètes.
Réunion la 1ère •

DÉRYÈR  SARYO

In santim lakèt pou la fwa Bondyé
Mé in santiman la pa in moné

Tèl byin fléri, baton lansan
Koko banane dolo safran
Parfin la lanp i angant amwin
Mi lèv plato dann gran matin

Kan mon zyé sèk i wa pi klèr
Mi gard Bondyé dobout anlèr
Dési lotèl na bonpé flèr
Mi giny frison é la mi plèr

Ma suiv Bondyé, ma pri ali
Pars mi yinm tout son gran zoli
N'a koz langaz dann la priyèr
Na boukanaz kanf pou lo kèr

Mars pat atèr
Si la blak so
N'a suiv an frèr
Déryèr saryo

Sak i moukat, i larg foutan
I koné pa sak nou rosan
Mi yinmré vréman zot i konpran
Lamour bondyé pou son zanfan

Mizérikord la pa mizèr
In moun i koz èk son fonnkèr
Lo tan lé long na pi talèr
Mé in gras i koul si nout malèr

Mizérikord la pa mizèr
N'a rèv ankor si zot mémwar
Kilé bondyé dann gran dézèr?
Nou vé pi mars dann gro fénwar!

Mars pat atèr
Si la blak so
N'a suiv an frèr
Déryèr saryo

Sabouk bénit Sint Vyèrz Mari
La fwèt la fwa pou Panndyalé
Pwatan Zézi la done son vi
Pou in pé réspé lamour la pé 

Kourone zépine dési son tèt
Té pa asé po tir bébèt
Dann gafourn nwar, dann kokodtèt
Bann gro blan-la patron lo mèt

Dann kèr légliz bann gouvèrnèr
Té tonm a zonou tèlman té pèr
Tansyon lo sor sorsyé malbar
Ziska té ki dor pi lo swar

Mars pat atèr
Si la blak so
N'a suiv an frèr
Déryèr saryo

Mé lo vré dyab té pa malbar
Pa plis lézot tanpir té nwar
Sakinn té viv dann son manyèr
La di tousa parèy lanfèr

Zot lavé pa ravaz pèrsone
Kolonizatèr konm siklone
La trap azot mèt dann bato
Po ni travay pou gro zozo

La done lo drwa sérémoni
Pou giny la pé… lipokrizi !
Navé pwin-n plas pou zot sèrvis
Kinm zis pou fé in sakrifis

Na in pé la mor dosou pyédbwa
préfèr pèt lof pou artrouv Shiva
la mèt la kord pou pi war sa
La mor tèrla po roinkarn laba

Mars pat atèr
Si la blak so
N'a suiv an frèr
Déryèr saryo

N'a suiv an frèr
N'a viv an flèr
Dann gran bato

La Rényon, frèr,
La fine éklo !
 
À la une
Voir plus d'info
Thématiques associées