Fonnkèr de Gaël Velleyen : "Fane silans amér"

Fane silans amér

Bli pa rakont zot marmay
Koman nout zansèt la sap lo may
San baz dési  in vin désanm
Té fine révolté dopi mwa d’ novanm

Koman la sakouy koud sagay
Pou kal sabouk, la niabou batay
La di non,  maladi la la pa bon
Anon kas la sinn la don, dalon

Violans  manigansé            
Silans si nout  pasé
Asé !

Apré malédiksion kolonialis
Na malédikasion nasionalis
Ek zot landoktrïnman an dous
Fine fane la farine si ton kér an dous

Lékol i touf nout léko
Lalkol i angouf dan nout koko
Nou grandi èk mové référans
Nout  bouro  i tonm éro pou la frans

Sékré nout rasine zot i anmar                
Pou asasine nout  bann pié kanbar*
Pangar !

Débat si lidantité nasional
Débaskil la médiokrité mantal
La lwa i tonm konm in satiman
Kadav i tonm dann katakonm gouvérnoman

Anou kisa ? kosa nou lé?
Kafé-o-lé, kaf malbar maoulé* ?
Fransé d’pi trwa zénérasion?
Forsé d’port la krwa la kolonizasion?

Liniorans i anfant bann rasis
Silans i dovyin négasionis
Fo ni rézis!

Rofrin:
Sak i nior listwar
Lé kondané mounwar
A rotonm  to-ou-tar
Dan lo minm fénwar
Efas pa nout mémwar