FONNKÈR : "Zié longani"" de Teddy Iafare-Gangama

Réunion la 1ère •
ZIÉ LONGANI

I di ou na zié longani, 
Sinonsa koman grin létshi.
Na dot i di lé an amann,
Kosa i vé dir ? Moin mi domann!
Parèy letshi ? Oui ! Moin lé sir !
Konm in marmay moin va atann,
É vèy azot ziska i mir.

I mir koman sa in zamann?
Di amoin banane pou out sourir
Nadfoi kan ou i dor i vavang,
Di amoin sa pou fé plézir,
Koulèr out po na lo gou d’mang,
Koulèr doré parèy domièl,
Koulèr sikré an zanana….

In zanana, mon zazakèl,
Inn tilapia ankor byin frèl!
Dann lo ou lé kom inn sirène,
Inn ti poison a po d’ébène!
Pli for k’in frui, ou sé l’noiyo,
Lo kèr, la baz nout fondasion,
Sak i fo nou, n’i fé atansion….

Out linosans, sé sa out shans
Agard la vi an longani
Agard la vi an zié létshi
Agard la vi an poézi
Sanm son koulèr larkansièl
Sanm tout limansité son sièl
Agard la vi koman lé bèl
Agard la vi oté manmzèl
Agard la vi, é bat out zèl !  


Teddy IAFARE-GANGAMA
        Zilié 04
 
À la une
Voir plus d'info
Thématiques associées