publicité

FONNKÈR : "Landmin shagrin" de Isabelle Testa

Retrouvez chaque samedi, un fonkézèr de l'île des poètes.

  • Réunion la 1ère
  • Publié le

LANDMIN SHAGRIN

Kosa in shoz ?
Mi roul mon sézi
Zamé mi ramas !
Momon
La touzour di amoin
Ek bann ti gout delo
I fé bann gran rivièr
Moulin la parol i roul son sézi
Konm roulo la mèr
Dann lo klèr la vi
Défann pa li zamé tourné
Nout langkozé
Nout poindvizé
Sa minm potomitan
Nout demounité
 
Pou toultan
Akoz pa
Trap lestilo
Trime in mond ek tout kalité le mo
Fénésans bann liv an papié kado
Rienk modékri pou konbat bal-fizi
Rienk kozman pou anbar le san
Rienk pansé dékalé
Pou kal danzé le tan

Pou toultan
Akoz pa
Tienbo kréyon
Konpoz in sosiété tizon
Ankor é ankor
Di… non !
Paravan Bondié, parasol larzan
Bouklié pétrol, politik san parol
I fagot arpa nout zanfan
An goyav atèr i suiv le mouvman

Pou toultan
Akoz pa
Dékraz la tèr
Rèv in mèr san kaparèr
Désine in vavangaz pèp lamayaz
Invant in fraternité fransh-vérité
I pran nésans dann semi zétoil

Ousa lonèr ek la dinité
La bezoin la sazès pou reflété

La liberté kozé
I doi roul son shanté
Konm roulo la rozé
Si fèy sonz mon pansé
 
La liberté kritiké
I doi roul son sézi
Konm fey dési fey
Dann zournal mon péi
 
La liberté invanté
I doi roul son mazi
Konm vag le sièl
Dann siyonaz mon rèvri

La liberté prié
I doi roul son shaplé
Konm lame-de-fon
Dann tréfon larmoni

Kosa in shoz ?
Kèl shoz ?
In vag loséan
Dann landmin shagrin le san
Kosa in shoz ?
In vag la mèr
Dann landmin shagrin la Tèr



 

Sur le même thème

L'actualité la 1ère partout et à tout moment
Téléchargez l'application La 1ère
  • AppStore
  • Google Play