Retrouvez chaque samedi, un fonkézèr de l'île des poètes.
•
MOIN LÉ IN POÈT
pou Gilbert Pounia
mi mazine pi mon vi san fonnkèr
mi mars / mi rèv / mi plane dann somin
mi vang èk mon palto larkansièl
moin lé in poèt
na inndé moun i koné pa riyin
i di komsa
moin lé in planèt
in planèt ... la lé zoli
… moin lé in planèt
oté
mi koné domoun i done larzan dévinèr
pou fé lir zot planèt
- inpé i di sa mové liv sa -
mé moin
moin lapa bézoin persone
pou guèt dann mon siél
moin lapa bézoin persone
pou dévir mon zétoil
moin lé in poèt
wayooo manman
si moin té mazisiyin
moin noré travèrse la mèr dann kok pistas
si moin té mazisiyin
moin noré maryé sanm lo fiy poisson
mé moin lépa mazisiyin
moin lé in poèt
mi mars / mi rèv / mi plane dann somin
partou mi sava mon liv lé gran rouvèr
na inndé moun i koné pa riyin
i di komsa
moin lé in planèt
somanké … somanké
mi mazine pi mon vi san fonnkèr
mi marsh / mi rèv / mi invante lo mo
pou amèn azot dann ron nout domounité
moin lé in poèt
mi anserv lo mo pou moin inm domoun
la lang napoin lo zo
mé
la lang nana lë mo
oté
in zanfan / i fo done ali dolé
mé
i fo done ali osi lo mo
napoin médikaman lé pli bandé
pou fé grandi marmay
napoin médikaman lé pli gabié
pou tir doulèr dann kèr
mi koné la valèr lë mo
moin lé in poèt
mi marsh / mi rèv / mi plane dann shëmin
partou mi sava
mi fane alë mo kom grin-mayi
na inndé moun i koné pa riyin i di komsa
moin lé in planèt
somanké…somanké…
Patrice Treuthardt
/outremer/2024/07/26/55eme-tour-auto-law-long-66a3cdd2dc541182832108.jpg)
/outremer/2024/07/26/img-0059-6-66a38f37a3186879455202.jpg)
/outremer/2024/07/26/dcd-66a35e456dcbc915147356.jpg)
