FONNKÈR : "Po war Bondyé" de Kafmaron

Retrouvez chaque samedi, un fonkézèr de l'île des poètes.
Réunion la 1ère •

PO WAR BONDYÉ

Konbyin karma fo nou trinn, po nou konprann nou lé inn
Po nou arviv an tandem, pou ko-kréé

Konbyin voyaz fo nou fé, pou nou giny war la boté
Lo bonér la touzour été, ousa nou lé né

Pryé pou gardé, po war la vi an poem
Po war bondyé
Pryé po gardé, dann zyé dann kér dann shakinn
Po war bondyé

Konbyin tabou fo nou dépas, po nou giny war sat lé fo
La pér na dann nout koko, Néo-kolo

Konbyin malér fo nou fé, fors tan rod déor lo koupab
Finn tan po nou arni responsab, nou lé kapab

Konbyin pétrol fo nou bril, po nou fini inporté
Lotonomi dann santyé, nou lé paré

Nankor dolo pou li koulé, nankor d’mo pou invanté
Nankor zistwar po konté, kisa nou lé

Pryé pou gardé, po war la vi an poem
Po war bondyé
Pryé po gardé, dann zyé dann kér dann shakinn
Po war bondyé

« Krishna Ganesh Mariamen
Om Zanahary Makwalé
Zézi Mari Bil ek El
Po war Bondyé
Guandi Shiva Mohamed
Allah Bouddha Om Salâm
Amen, Amine, Kiliman
Po war Bondyé »

Konbyin karma fo nou trinn, po nou konprann nou lé inn
Po nou arviv an tandem, pou ko-kréé
 
À la une
Voir plus d'info
Thématiques associées