FONNKÈR : "Ti Mari" de Loran Dalo

fonnker
Loran Dalo "Ti Mari"

TI MARI

Ti-Mari lé zoli, in zoli ti fi

D’si padport la vi

li zwé, li kour, li ri

Ti-Mari lé zoli, Ti-Mari la grandi

In zoli zèn fi

Li la parti fé son vi

Ti-Mari lé zoli, Ti-Mari la viyéi

Li na garson, li na fi

li zwé pi, li rir pi

Ti-Mari té zoli… Toulézour li pri

pou k’son boug i bwar pi

pou k’i arèt tap ali

Ti-Mari té zoli… Li la désot la vi

sou le kou son mari

na pwin pèrsone la vi

Dann karo kann la briz i fann

Bann fèy konm fanm i farfouy

nout kér pou fane lamour

Afèr ti fane flér fanm la ziska fane la mor foutor…

Ti fi Ti-Mari lé zoli, in zoli ti fi

D’si padport la vi

li zwé, li kour, li ri…

 

Loran Dalo