FONNKÈR : "Zinzin mon kouzin" de Gilbert Aubry (Mgr)

Retrouvez chaque samedi, un fonkézèr de l'île des poètes.
Réunion la 1ère •


ZINZIN, MON KOUZIN

(Aux plus royalistes que le roi)

Ti di réyoné lé "Chauvage"
Ansanm son kouzouk "de langaze"
Ti kroi k fransé la lé bien pozé
E ti di k kréol la lé malizé
Ansanm son kozé kas-kasé
K lé zis bon pou plézanté
Arèt ton mouvman
Si toué lé pa kontan
Pran kostan

Diam diam badadiam
Dav dav koudav
Ekout bann zazakèl
I rir konm kaskavel
Zinzin mon kouzin zérmin
Lo roi la pa mon kouzin

Koz konm ti vé mé larg pa nou
Larg pa ton monmon larg pa ton papa
Tienbo tout ton frèr tienbo tout ton sèr
Larg pa ton kaz larg pa ton kor
Tienbo ton péi tienbo toué minm
Pangar ti sot la mèr
Pangar ti pérd ton kèr
Pangar ti trouv pa ton bonèr

Si toué lé pa kontan
Arèt ton mouvman
Ekout bann zazakèl
I rir konm kaskavel
Zinzin mon kouzin zérmin
Lo roi la pa mon kouzin

Kréoli-kréolia laban-o laban-ba
Wayo waya vir-viré lèv-lévé pous-pousé
Sa minm nout bor sa minm nout sièl
Si dan nout pèp larkansièl
Inn lé pou tout tout pou inn
Na dir azot n'amont azot
Koman k i fé klok le grin kadok
Kan k oulèr maloya... diam diam badadiam
I poik la po konm in solèy an gadianm

Pangar ti pérd ton kèr
Pangar ti sot la mér
Ekout bann zazakèl
I rir konm kaskavèl
Zinzin mon kouzin zérmin
Lo roi la pa mon kouzin.

Diam diam badadiam
Diam diam diam badadiam
 
À la une
Voir plus d'info
Thématiques associées