37tyèm jouné entèwnasyonal a kréyòl

Sa ka fè 37 lanné yo ka voyé kilti kréyòl monté. Dèpi en 1983, 28 òktòb sé jou pou voyé limyè si lang la, pas sé jouné entèwnasyonal a kréyòl.
On bèl pwoposisyon a "Band zil kréyòl", on gwoup moun ki doubout pou i pa té mò. Premyé douvan sété péyi Séchèl ki goumé pou sa. Domnik, kont ay, té ja ni "kréyòl Day" osi.

Sé Manno Gombauld ka fè nou sonjé komansman a évènman lasa :
Alèla kréyòl ka jous sizé lékòl, parapòt a twavay la vayan moun pòté, pou i ni plas ay andidan ay !
Moun ka palé-y, moun ka maké-y, moun ka li-y. Kréyòl annou, sé lang kon tout lang.

Onlo biten fèt jòdla, alantou a kréyòl, pou jouné èspésyal lasa : dikté, bokantaj, omaj... tou sa pou pon moun pa di ankò kréyòl sé lang a vyé nèg. Jodijou, kréyòl sé lang moun alantou latè ka palé é aprann.

Es ou té konnèt ? Ian Hancock, ki sé on gwan pwofésè an lékòl o Téxas, konté 127 kalté kréyòl asi latè, an 1977.