FONNKÈR : "Amour volé, perdu..." de Jade

Retrouvez chaque samedi, un fonkézèr de l'île des poètes.
Réunion la 1ère •

AMOUR VOLÉ, PERDU...

Somin lé long pou rotrouv a ou
Somin lé long pou arkos koté ou
Paréy lo van i aral a mwin lot koté
Tro tar... tro to !?
Zamé na konét
Soman zistwar la fénwar mon kér
Rozman mi lé sét mi lé, dobout pou avansé, dobout pou mon fiérté
Mon mizik mon sorsélri, en sorsièr kan na linspi
Ou té vé in santé !? Ou va giny in diks antié
La dinité, lo respé
Sa ou té koné
Soman sufi inn ot i arpone out kér, pou ou oubli nout bonér, pou ou oubli nout mayaz la koulér
Anseveli sou dzoli mo dou, out zoli kozé an fonnkérizé, out bann zimaz fitirizé
Aster ou pi parabolér pou mwin, zis bo parlèr
Apré takon zéfor pou aral a mwin dan out rév
C kan mi komans viv lo rév, k'ou fine rév sanm inn ot fémèl
Kosmar la ranplas lo rév
Sa la pa pran tousala lo tan..pou mwin armét mon karapas la kolér
Tousala lo tan...la travay anndan, ziska tanpi, ziska...zordi !
Zordi lo sablié la fini
Défwa manvi gard anndan, dawar inn ti grin volkan i tiyin bo lo tan !
Ariv in lér fo arpran son lanvol, an vol volé an vol o van
Sat i t ral a mwin anntsandan, ester i ral a mwin par dovan
Dovan mon kalité, mon gayarsité, mon destiné !
Rév'éiyé

Jade
À la une
Voir plus d'info
Thématiques associées