FONNKÈR : "Dofé" de Gaël Velleyen

fonnker
Gaël Velleyen

 
"On ne construit rien sur les cendres" Annick Girardin,
durant le soulèvement "Gilets Jaunes" Novembre 2018


  DOFÉ

Dan la sann, Nou lé né dan la sann
Nout péi i agrandi sak fwa la lav i désann
Nou sof nout tanbour sanm dofé la fournèz
Mwa d’désanm, Dan la kour, nou mars si la brèz

Nout péi dofé, li lé skilté dann la lav
Par lo bra zésklav, Zonm, Fanm, Zansèt Brav
Yab Kivi Maronér, Komor pirogér,
Malbaman, Moringér, Sakalav

Ansanm dofé  nou pirifi, nou sakrifi,
Nou pirz, anou minm démiyirz, nou sanktifi,
Ala nou la, nou nana lo magma dan lo kér,
Tonm dovan Alvan, li minm gardyin doféklér

Nout péi dofé, la tér i vomi lo san
Tout zéléman sakré, lé dan nout kan
Lo pèp an bann i sa bril bann karo kann
I sa nétway la tér, térla pou détamann

Pou tasmanir, fé pous la sous mayi tann
Nora pou manz, pou bwar, pou doné pou vann

La brèz nou manz, la nèz nou démanz,
Dan zot twal imakilé, nou lé la glèz, nou déranz
Divinité volkanik, nou na Larkanz
Nout Kréolité lé mistik, nou soubat, nou vanz

Mi yinm son koulér
Dofé, i klér
La lav lé fértil
Dofé i bril
Pirifi mon doulér
Dofé, i klér
La matiér an péril
Dofé i bril


Nou ador dofé, nou pri bondié Solèy
Pou angant la tér, konm pou fé rèv inn ti fèy
Na fé pous matarom èk son réyon doré
In rwayom, in larmé piédbwa la foré

Dav ti koudav dav dav, Nout sa désann ! 
Dav ti koudav dav dav mon bann !

Tinn pa dofé mon bann !  Tinn pa dofé !
Nou minm bwa d’ébinn, zoli zétinsèl nou fé
Tinn pa, dofé !  Atann ! Tinn pa mon bann
Bril, Ziskatank la brèz i mélanz èk la sann

Oté Mounwar ! Sa i vol, sa lé gri_nwar !
Fimizinn volkan sa lé ostantatwar .
Pangar si nou la krwazé dan la krwazé,
Koté la krwa zibilé, néna poul nwar !

Si la lav i roul, sir k’son zi lé zone,
Galé la brèz i déroul son tapi rouz dan la zone
Piton dofé i koul ! Son kér i ésploz, la brèz I koz
La tér likid i aroz la fone ! 

Nou rant dan lo kratér,  Nou sort dan lo matriks
Nou lé ankré dann kré la tér, nou fiks
Batarsité lé pa dan zot norm
Nou lé antikonform, nou transform
Lom-animal konm féniks

In tèks mwin la fé pou boks la vérité i blèks,
Mon lank ? La sann !  Dofé ? mon prétèks !
Sof koman koman, sa i bril an zwazo piman
Akout kozman, akout koman i vèks

Mi yinm son koulér
Dofé, i klér
La tér lé fértil
Dofé i bril
Pirifi mon doulér
Dofé, i klér
La matiér an péril
Dofé i bril


Yab Kivi Maronér, Komor pirogér,
Malbaman, Moringér, Sakalav
Yab Kivi Maronér, Komor pirogér,
Malbaman, Moringér, Sakalav

Zarabé Tsarabé Nawashi sanm
Sak la dsann dan la sann la mélanz ansanm
Rédui an sann,  pa parazar msié madanm
Sak i dsann pa zamé,  zamé na mélanz ansanm

Ni lo tan,  ni la tér lo san
Va fé nni aou in bon brèz volkan
Réyoné nout san
Kréolér nout ran
Fonnkézér nout foutan
Kréolisionér nout kan 


          Gaël Velleyen
 
Les Outre-mer en continu
Accéder au live