FONNKÈR : "Èt in moun podvré" de Karol

ÈT IN MOUN PODVRÉ

Marmay asiz trankil é rouv zot kayé

Zordi nou sa réflési  in pé

Zordi nou sa fouy dan nout langkozé

Mi vé zot i di a mwin èt in moun kosa i lé ?

Sanm zot prop mo èt in moune kwéksé ?

Ben madam ou wa la, ét in moun

Èt in moun sé kan ou lé in kok

Èt in moun sé kan ou la réisi out vi

Kan ou mars dann somin bana i pran pa ou pou in véyèr la kok

Kan ou parti lwin lékol, kan ou sé pa in kitouni

Madam, amwin mwin sra vréman in moun lérk ma giny tir momon dan son shlmr

Kom aou madam ou sé in moun

Ou lé fonksyonèr,

Davwar out bann paran lé fyèr

Koman di a zot ?

Lé vré, lo tit fonksyonèr la rann bana fyèr

Par la plas zot zanfan, zépol la rouvèr

Épi mwin la koni amèn mon rol

Mwin la giny fé gran lékol

Kèm dé sertin té fini di té mal baré

Sanm mon figir kaf épi mon sové konyé

Mé mwin la telman byin dans dan zot bal fé sanblan

Ké zot la presk bliyé ké mon po té pa blan

Sitan mwin la rant dann zot langrenaz formataz

Mwin mem mwin lariv ziska krwar ké zot fason d’viv té fondasyon mon kaz

Mé pangar, pou èt in moun komkifo in moun apropté

Falé mon soulyé té byin listré é mon sové byin défrizé

É la, pwin dkozé kreol

Margony a li ton kaz mé pa dan la kour lékol

Tout té byin aranzé pou éfas mon kisamilé

É sirtout pou èt in moun

Di pa sé larzan rmi la fé grandi a twé

Ni ké pou sony atwé falé papa té bèk la klé

Madam ! Ou koné pou mwin èt in moun, in moun gabyé

Sé kan ou manyé byin la lang fransé épi langlé

Parsk madam fo èt onèt

La pa out kréol sa fé giny a mwin in métyé

É sé pa sanm out kreol mi sa giny alé voyazé

Madam mi yèm aou Vèks pa hin, mé momon té vé pa mi té vyin latelyé

La di li anvoy pa mwin lékol pou zoué

Kréol, in lang pou kas lé kwi

Tansyon sanm li ou fini an laspèr kwi

In byinvéyans san konpran

Kan mèm in momon i anpwazone son zanfan

Préfèr aval antone sèk déor lo zyé fèrmé

Plito ké komans par aprann nout prop langkozé

Mé kisa lotér ?

Kisa lotèr ?

Kisa lotèr kan isi i fé rényon pou koz si kréol mé pa an kréol

Kisa lotèr  kan magazin i vann aou linz koulèr sèr

Mé ké out sèr lé plis kafé griyé ké klèr

Kisa lotèr kan koméla mèm la boutik sinwa i koz aou black friday

Ou kan halloween la fini ranplas nout gran mèr kal kèl èr i lé

Kisa lotèr  kan pou pa pas pou in sarzèr dlo

Dèk lo pyé i pas la porte in biro

La lang i démay an fransé makot

Ou byin kan in je taime mentèr lé pli légitime

Kin mi yèm aou mon kafrine

É sora aki lotèr aster

Kan marmay la va alé rogard dan la glas

É ke son figir mélanzé i donera pa li in sans pou trouv son plas

Èské li sora kapab réponn intélizan

Kan sèk va sorte déryèr brizan

Va fé port ali si son tèt skyzophrénie culturelle an létikèt

In zoli fason kashièt ou plito éfasé

Konsékans zot la vol si plizyèr zénérasyon  son domounité

Madam mi konpran pa out konsyn

Aou in kou pou réfléshi

Po ou èt in moune kwéksé

Done a nou out lavi

Pou mwin èt in moun, èt in moun

Souvan défwa kom zot mwin la pansé

Pou èt in moun falé mwin navé bon travay, bon kozé é bonpé la moné

Telman zot la di amwin  viz pa tro o ma tomb byin ba

Mwin la kas kontour é mwin la vol dann ta

Mé mwin té san pa mwin ankor èt in moun

Pou konpran anndan mwin la parti aprann yèm mon  vré kozé

La mèm done amwin la zèl pou fé fonnker

Pou ésèy rakont mon zistwar san la pèr

Mé la ankor mwin té san pa mwin èt in moun

Kan mwin la konpri mwin té zis in parad

kan falé èt pouponé pou di dé mo dovan micro sanm kanarad

Alor ké na dot i dor la zol anfermé pou défann zot péi sanm zot lonèr

Alor kosa èt in moune pou mwin

Mi san mwin èt in moune isi, la , sanm zot mon bann ti kaniki

Kan mi ravaz zot lespri , pou prépar a zot pou zot domin

Kan dan zot vi mèm parfwa dann fénwar

Mi giny alim in ti zink léspwar

Pou mont a zot a kèl pwin zot zot lé zoli

A kèl pwin zot zot néna gayar

Dobout si lo parvi zot vi

Si mi giny èd a zot trouv somin zot kisa zot i lé

Ala sèk i èd a mwin èt kisa mwin mi lé

Èt in moune podvré