FONNKÈR : "Famm Kouraz" de Reine

Cette semaine, à l'occasion de la journée des droits des femmes, Reine a voulu parler aux femmes... ainsi qu'aux hommes !
Réunion la 1ère •

FAMM KOURAZ

Famm, dan la vi, y açosi a ou a la boté, la pwin in kréatir ek ou y guingn rivalizé. Ou roprézant’in pilyié dan la socyété, mé ou lé pa touzour byin vi, ou lé pa touzour byin aprésié.

Dopi mil nef sankatrovin dé, la zourné lo huit mars té soizi pou ou êt valorizé. Cé lokasyon exprim’ a ou in léternel rokonésans, o mwin pou ce don ke ou nana la, pouvwar donn nésans.

Don ke lé pa perçi pou tout’ zimin parey, kan nou wa dann zournal et dann zaktialité, tout’ révélasyon atros’par rapor bann zak insancé bann lo zom y komé.

Famm, ou mêt touzour la limier dan out foyé, kom in momon poul, sou out zèl tout zafer ou va kazièt. Pou sov out boner, tout zafer ou akcêp. Out blesir, out soufrans, tout out sirmont.

Ou trouv’ touzour in kompromi, pou zer lo bann sousi, dann tangaz, ou évit’ mêt lo gaz, pou ké la pé y règn touzour dans la kaz. Dann sertin ka, batu, bafoué et maltrété, ou va anferm a ou pou pa kozé, telman ou nora ont’out lantouraz mé, la soufrans va roflèt si out visaz.

Resman zordi, na laçosiasyon pou akey a ou, pou èd a ou rotrouv out lidantité et rékaz a ou dan la socyété.

Ou poura zamé êt métrès out destin mé pou pouvwar kontourn in pé zobstak si out shomin, dopi zen zen, asèt ou lindépandans, fé prèv lintélizans, essay guingn out vi san êt dépandan in bonomm.

Lès pa ou intimidé, exprim a ou, fons’ et fé oner out personnalité. Ou na pétêt pa lé mem kapacité bann sex opozé, mé kisa y pé donn nésans ? Ce pouvwar la, ou krwa pa ki fé déza la diférans ?

Famm, la grass, lo boner pouvwar anfanté, ryin ka ou y pé. Donk, solman pou ce pouwar ki apartyin ka ou, ce pouvwar de donn la vi la, y dwa insit’ a ou êt fier dêt in famm et otoriz a ou proklam ho et for out légalité.

Zordi c nout zourné, alon fété.

Reine
 
À la une
Voir plus d'info
Thématiques associées