•
Fonnkér fanm
Oula kriyé
Domounité rod kisi milé
Kisamilé kisamilé
In kafrine milé
Rase mélanzé milé
Alé diazot mwin larivé
Ala mwin la zis zk mon lanvi
San simagri
Partaz lamour
Toulézour dann zalantour
Mon langkozé pét an flèr dann mon kér
Klér mon ziyé
Ta kap war mon krimandé
Mét la limiyér si mon fikir
Ta kap war mon fanmité
Ta war si milé matyr
Tanbiyn minm la giny koud sintir
Mwin la kriyé mwin la kriyé mwin la kriyé
Oula kriyé
Kan ou lariv si la tèr
Kan ou lé né
Ladi ou la kriyé ?
Kisa la di ou la kriyé ?
Po kosa ou la kriyé ?
Koman ou la kriyé ?
Pandan konbiyn tan ou la kriyé ?
Mon frér mon sér
Ou rapél la doulèr out kriyé ?
Mon sér mon frér
Navé pwin pérsonn sanm ou la kriyé ?
La min Bondié nout parosol nout natir
La min Bondié mon parasol mon batarsité
La min Bondié soulaz nout kriyé
Doumounité domann akoz fanm la kri bonpé
Loralité mon fanal ékléré détak tout mon kwinsé
Ma kriyé tout sak na po kriyé
Ma kit mon boubou lésklavaz alé
Sony mon kér
Sanm lamour fonnkér
Po rév mon zansét
Mi port mon fonnkér anlér
Ma kriyé
Ti kriyé misouk an kasiét
Zordi napi mizolièr
Ti kriyé dofé san zalimèt !
Zodi an limiér
Mon fonnkér fanm mon liberté kozé
Mon libérté kriyé
Si la térla paré toute domoun i kri
I kri akoz doulèr dann piéd kér
Nad kriyé mandian lamour an souplé
Nad kriyé pardon pou sak ou la fé
Bann kriyé mayé an ladifé
Bann kriyé kamouflé an toufé
Mon kriyé fonnkér
Mon fonnkér fanm po kriyé
Si nou la mwin na pwin po lévé
Si nou la min na pwin po lévé
Mon fonnkér fanm po di
Kél kalité bononm
Kél kalité domoun
Kél kalité sosiyété
I oubli bann pli maléré
Pa bozwin imilié tapé jiré arsolé
Maltrété abizé violé tiyé
In fanm in matante in gromér in zanfan in ti fi in sér
In monmon in zarlor I papa in kador in sér in frér
Koud klak koud piyé la saboulé
La krazé la toufé la tiyé
Lo kor défrishé in vi volé
In fami an plér martirizé
Mon kriyé fonnkér
Mon fonnkér fanm po kriyé
Noulé pa plis noulé pa mwin
Noulé pa plis noulé pa mwin
Mon kriyé la min dovan lo ziyé Bondié
Pwinn in sél rase pwinn in sél fason priyé
Nout tout zanfan Bondié
La min Bondiyé nout parosol nout natir
La min Bondiyé mon parasol mon batarsité
La min Bondiyé soulaz nout kriyé
Mon fonnkér fanm mon libérté kozé
Mon fonnkér fanm po kriyé
Si nou la min na pwin po lévé
Si nou la min na pwin po lévé
Mon fonnkér fanm po partazé po yinmé
Po dot kriyé kontanté kolé séré
Po dot bonér, malér , galér
Mwin la kriyé
Ou la kriyé
Toute kriyé i domann lèd Bondié !
La min Bondiyé nout parosol nout natir
La min Bondiyé mon parasol mon batarsité
La min Bondiyé soulaz nout kriyé
Mon fonnkér fanm po kriyé
Forstan lamour i pèt an flèr
Lamour lo mo i pèt an flér
Lamour lo mo mon dobouté
Lo mo mon swé siplétadié
Fanafout lo kér Bondié mi vé
Siplétadié siplétadié siplétadié
Cathy Singaïny inspirasyon koté : Danièle Moussa Oula kriyé
/outremer/2022/01/01/61d05853c5946_0217580001614251730-1852383.jpg)
/outremer/2024/12/27/vs-recuperation-des-jouets-la-possession-elodie-maf-frame-152-676ed212568ad815733802.png)
/outremer/2024/12/27/img-20241227-wa0014-1-676ea568df592560573500.jpg)
