FONNKÈR : "Fonnkèr in mamange" de Essanam

Réunion la 1ère •
FONNKÈR IN MAMANGE

Néna momon kouraz
Sak i débat ek la raz

Néna monmon zoli
I Koné pi kisa lo momon kisa Lo fi

Néna momon lamour
Sak i done tout san kas kontour

Épi néna momon nou koz pa
Momon silans, momon labsans.
Momon kan mèm...
Parol in mamange zordi mi lans:

Lèrk ou té pli ti kin grin dé ri
Ou té fine savir mon vi
Lèrk persone té mazine aou ankor
Ou té déza tout mon lor
 
Ou la viv
Ou té la mon gaté
Ou la viv

Ou la dévir tout nèt
Ou la rann vèr tout bwa sek
Ou la fé amwin momon

Lèrk bana i di aou baba la pèrd
Mi di non: ou la viv.

Dann Fénwar mon vant ou la viv
Dann kadans mon kèr ou la viv
Dann larkansiel mon lémosion ou la viv
Mon kor in mond in linivèr

Mon kor in mond TON linivèr
Ou la viv andann la Sanm mwin,
amwin sanm ou
Ansanm nou la viv mon gaté
Ou la viv
 
Ryink in momon i koné la vi la
Ryink in momon i koné sa

Pou tout bann zoli momon lam
Li la viv
Zot kor in mond in linivèr.
Zot lé momon é zot i pé èt fièr
Zot kor in linivèr.

Pou zot é Pou tout kalité momon
In Gayar fête des mères.

 
À la une
Voir plus d'info
Thématiques associées