FONNKÈR : "Kèr kréol" de Éric Naminzo

fonnker
Éric Naminzo
R KRÉOL

An zanone, kèrdamann
An line zone, solèy tann
Simandèf pi tamann
Kank zoumine lé mavouz

An karès zalizé
An parès balansé
Li kadans son roulèr
Pou fé fane son doulèr
Pou fé fane son doulèr

In bérsak frasité
Pou défris nout karo
Kont bértèl fransité
La po koul nout bato

Lès amwin révé !

Lès amwin rouv mon zèl
Po fé vol Larényon
Lès amwin rouv mon gèl
Po fé kri mon nasyon

In limyèr va kléré
Pli for solèy bondyé
Li va tinn la kolèr
Va bril tout mové kèr

Sof aou, sof amwin
Nout dé ou in minm kèr
Pa zordi pa domin
Nout péi dann féklèr

Nout dé ou in sèl kèr
Po rézone dan la mèr
Si la pwint nout Piton
Na fé lèv nout nasyon