FONNKÈR : "Kolkol" de Mari Sizay

Retrouvez chaque samedi, un fonkézèr de l'île des poètes.

Réunion la 1ère
Publié le 09/02/2019 à 13:01

KOLKOL

Ou la done amwin in ti riyin
Pa gransoz zékli in zik
Gigine té mank amwin
In tro plin
Sa la pa riyin la rouv somin
Somin la vi somin i sa lwin
Ou la kado amwin gayar
Néktar i koul si mwin
I kol amwin
Ou la rouv an gran lo dra la vi
Ou la kouv amwin kom in monmon
Kanmèmsa té pa sifizan
Ou la ral amwin dann tan lontan
Dann zardin grin bourzon
La éklo an gronadine don
Po touf lo rézon
Po fé lèv bann kapkap
An farine lor bénédiksyon
Kaskavèl la fane son mèrvéy
La dégrinn in lakwarèl
Bèrtèl promès mirak léo
Po ansoursoulé nout syèl
Larm la vyèrz i roul dann kre nou dé
Son pétal do myèl i ranpli an bonpé
I zigzig nout lam an brèd mafane
I fléri lyane an très nout sové
Mwin lé kom in line o plin dann out dé min
I nétway an karès mon sagrin
Ek koté zou frwi mir an partaz
Mi giny pi a domi
Mi rékolt mon tout an voyaz
Lamour lé dou dann fré kreson blé
Mon kèr lé klèr dann dolo out zyé
Zépïng satan i piq pi nout dodan
I protèz èk zépïng lo kris po toultan
Alé aou partou sap dann somin
Dann granmatin
Mi koné ou lé pa lwin
Aou dann tout dann riyin
Nora touzour po inn po dé
Po sat i vé koté Bondyé
La plas po zam éré
Out ravine i koul dann mon bordkèr
Marmay i désine po galé lis nout bonèr
Dann la krwazé somin
Mi swèt aou mélanz la pli èk soléy
Po giny kolor out larkansyèl
In takon zirondèl
I vyin anons in bon nouvèl
arvyin aou pli gran
Artrouv anou plis dovan
Arèv anou dann kontantman
Sat ou la kado amwin sa la pa riyin
La rouv somin somin la vi
Somin i sa lwin
Kolkol aou kont mwin
Débord aou pli lwin