FONNKÈR : "Konm in shyin dann in larozwar"" de Galé Dolo

fonnker
Galé Dolo

KONM IN SHYIN DANN IN LAROZWAR

Konm in shyin dann in larozwar,

Mon grinn kozé té pa arozé

Koz ton kozé nawar,

Si fransé ti giny tiré

Konm in shyin dann in larozwar

Aforstan pa kozé

Po la Frans mi tonm tro nwar

Mé la lang la fine amayé

Konm in shyin dann in larozwar

Tazantan I fo pirzé

La d’a’nou lo sal po bwar

Fé pas ali po dolo sikré

Konm in shyin dann in larozwar

Gèt ti brèz la po kléré

Kas kontour, sort dann fénwar

Rouv la gèl po souké

Konm in shyin la sort dann larozwar

Konmsik promié fwa mi rouv mon zié

Ou lé pa péyé po krwar

Mon grinn kozé la po zèrmé

Konm in shyin la sort larozwar

Sak la pousé mwa la okipé

Éstèr m’a mont atwé, ta war

Mon flèr d’kozé la pèt an bouké

Konm in shyin la sort dann larozwar

Mi ésèy trouv mon kisamilé

Agard la, dovan zot mounwar

Ziska fonnkèr m’a niabou d’tiré

Galé Dolo