FONNKÈR : "Larak" de Dominique Deniset

fonnker
Dominique Deniset
LARAK

Oulé in salté, in salopri
Ou sof mon tèt, ou soul mon lèspri
Pès pouritir, oulé in pwazon
Sanm ou, mi pèrd la rézon

Dési mon kor, boubou la po pousé
Pwak pawké, mon po
An tapok milé
Mi rosanm pi ryin
Mon lantouraz y koné pi mwin
Ou larak, tout mon byin

Dovan la glas mi rofiz fé fas
Mi koné pi mon pil èk mon fas
Sapa lasias,
kan ti fé marz amwin katpat ?
Sapa lasias,
Kan mi pran trotwar po robor kabiné ?
Alé syé don !!!

Zordi lo sis, sinwa kontan!!!
Efas krédi, mi pay kontan!

Si la pa zoni èk zak
An dodo, an bordo
An rwayal, an pliplat
Mi tasmanir kine aou
Si tèlman oulé dou
Mon lestoma, y giny pi ranvway aou

Dann mon soulézon, mi zir
An simagri, mi dmann pardon
Mi bwa ziska mi tonm
Forstan ma krèz mon tonm

Oté kitabwèt!!!
Out léfé fé lèv mon bébèt
Mon gozyé la po sèk
Armèt in koudsèk!
Zis in dé, in tigine, in tigout

Tigout par gout mi gout
Komsa lé dou
Mon kor y tranm
Mon bous y dmann ankor
Tigout par gout mi gout
Wi ou lé dou
Sanm ou mi sant
Mi dans ziska mi dor

Mon vi, ou la akaparé
Sanm ou, mi lé mayé
Sanm ou, mi soulaz mon doulèr
Sanm ou, mi vid mon kèr

Oulé mon kafé dopi gran matin
Oulé mon tizane po anlèv mon sagrin
Oulé mon dalon po akout mon traka
Out dégré y mèt amwin dann la zwa

Sanm ou mi giny pa di non
Sanm ou mwin la pa ont
Sanm ou milé byin
Sanm ou mi sant
Ziska somey y vyin sèrs amwin

Mi giny pa kit aou
Lès amwin si bordaz somin
Si lapa lamor po ral amwin
Pétèt mon fami
Va nyabou ramas amwin