FONNKÈR : "Le spèrkui" par Jessie. Texte de Gilberte Rougemont

LE SPÈRKUI          

Dann tout kaz nout péyi

Shé tout nout bann fami

Nana in pèrsonaz

Lé for pou fé mont out raz.

Toul tan li lé parti

Li ariv jis midi

Kan le manjé lé kui

I rès jis pou sèrvi.

Dépi  dan la kuizine

Li komans fé la mine.

Tou sak ou pé fé kui

Zamé i plé pa li.

Li di : do sèl na tro

Do ri lé an soso.

I mank de fantézi

Toul tan nal mèm kari !

I empèsh pa li d’ manzé

É mèm de rebisé

Mé kan son vant lé plin

Pou la vésèl …TINTIN !

Si ou la bat lo zyé

Li la fine fofilé.

Zot la rekonir li, mon frèr ?

Nou di sa  :  in spèrkui.

Souvan sé tin garson

Ė parfwa sé tinn fi.

Mé dan tout kaz nout péyi

Shé tout nout bann fami

Na touzour in spèrkui  ! 

^{dit par Jessie Edmond}

^{Texte de Marie Gilberte Rougemont}