FONNKÈR : "Léfé dopaz"" de Reine

fonnker
Léfé dopaz de Reine

LEFE DOPAZ

Mi koné pa si dan zot vi, la déza ariv a zot êt dépandan in boisson. Mwin, mwin la ékri ti zistoir la, pou fé in kozé ek mon boisson préféré. Mi site ar pa zot son non mé mwin lé sur zot va deviné parske li lé telman délicié kan face de li ou pé pa résisté.

« Oté dalon » on diré nout dé ou la sign in pak. Ou ampoizôn mon lorganis. Ou fé monte mon to désik. Ou kontray mon korpilans, bann ti bourlé y miltipli an konsékans é pourtan, mi guyngn pa siprim a ou dan mon lexistans.

Kan mi sa va fé kours, mi évite pass dann réyon boisson pou pa kroiz ek ou, mé dann tout kouloir, ou lé an têt gondol, ou bar a mwin shomin, mi guingn pa kontourn a ou. Mon zyé y rès fix kom sik ou inoptiz a mwin. Ou lé mon brévaz, ou lé mon dopaz.

Lé zot boisson y lès a mwin indiféran, rien kou mêm kapab étansh mon soif, kapab rafréshi mon gozyé é désaltèr a mwin.

Tou lé zour, mi di, mi arêt konsôm a ou mé dèk mi aperçoi le pti boutey noir ek son pti boushon rouz, mon boush y saliv, dan mon servo kom sik diré toute y tourn o ralanti.

Pourtan moin lé konsian toute déga ou pé kozé mé, malgré sa ou rès mon préféré. Sak foi mi haby a mwin, mwin lé anragé, mi koné pi kel linz y fo porté telman mwin lé kom in pti baba ranbouré.

Mi yèmrai pouvoir ray a ou dan mon vi mé ou lé partou dann toute société. Y fé in po, y fé in réinyon, si la tab ou mêm promié zinvité. Lé vré na dot varyété a koté mé cé déci ou ke mon zyé y rès fixé.

Ziska kan ou konte amprizon mon vi ? Es kin zour, mwin nora vréman le kouraz délès a ou ?

Oté mwin la gyngn sapé dann sitiasyon pli dir ké sa, zordi in lespès pak diabolik mi guyngn rapa kacé ? Ma procèd par palié, ma komans par siprim a ou pou in moi, sora déza in gran pa de fé. Ma guingnyé, mwin na la volonté mwin. In boisson y pé pa komann a mwin.