FONNKÈR : "M'imazine" de Teddy IAFARE-GANGAMA

M'IMAZINE

M’imazine ankor in tan Lalé flanboiyan

Té i pous pa pli d'van pou éfas son tan

M’imazine ankor in tan Lalé flanboiyan

Té i oz rouv tout son la ont an gran 

Gro mar la bou, marmay tan d'pli

Té i ézit pa alé zoué anndan

M’imazine ankor in tan Lalé flanboiyan

Té i rèv minm pa in lékors an la po goudron

M’imazine ankor in tan lalé flanboiyan 

Lété pa loin, pa loin shanz son non

Mi vé pa rèt dann in degré d'nostalzi 

Pou in bout la tèr la fine parti

Mi vé zis raplé pou pa oublié

Dir pou pa ou i mazine nou i vé kas in sékré

Fé antann atèrla anou osi

Dann in tan nou lavé

Boidlé

Bingn kanar

Tié koshon

Krout boubou an la po graton

Zèt nout kor dann basin la ponp

Kas la ponp

Kas nout kor

Kas nout pip

Kas nout sor

Par nou-minm ankor

Nou la gété nou la pa vi arivé

Basin blé, basin la ponp

Kanal dolo, tousa k'dann fon

Nou la pa okipé, sétalor la parti maron

Ziskatan marmay té i sar pi bingn anndan

Ziskatan lo mir la pous bout par bout dovan

Ziskatan zèrb an pongné la fé son bèr dodan

Ziska ti bondié-minm, in lèr, ali osi la foulkan!

Nou la gété, nou la pa vi arivé

M’imazine ankor in tan

Na poin si lontan

Gardyin lizine lété bann zanfan

Lo zié dann fénoir té i trouv shomin vitman

Pou dékraz zot kor a kor an zaman

La minm, dann lalé soutérin

Lodèr la grès an plin

Borabor tablisman

Dovan biro

Borabor tablisman

M’imazine ankor in tan, Lalé flanboiyan

I di koté la-minm néna zistoir zavan

Nou la gété, nou la pa vi arivé

M’imazine ankor in tan Lalé flanboiyan

Navé ankor d'flanboiyan anndan

 Kosa Lépron dann in tan?

Avan, isi, mintnan?