FONNKÈR : "Mizik la vi" de Galé Dolo

MIZIK LA VI

Nèf fwa la line, Mon Rwa,

Té plinn, la line, Ma Rèn,

La di fo rod parin, mi krwa,

Inn par inn, trouv inn marèn.

Konm di l’kont, kont si ton dwa,

Inn plis inn mi di i fé … trwa !

Vwala pa k’lo ti baba,

La fé in monmon, la fé in papa.

Ton ti boush si mon tété,

Zié dan lo zié,

Nou lé éré,

Tioukoutiouk pou dormir,

Tioukoutiouk pou manzé,

Tioukoutiouk pou twé rir,

Tioukoutiouk pou pa pléré,

Tioukoutiouk sa nout gaté !

Ton ti boush i nanm in dwa,

Navé in fwa,

Mësié Lo Fwa,

Tiapatiap pou grandir,

Tiapatiap pou papa,

Tiapatiap fé plézir,

Tiapatiap pou ton Dada,

Tiapatiap nou sra touzour la !

Ton ti boush an masikrok,

Konm an zobok,

Koko i blok,

Yinkinyink pouléré,

Yinkinyink i fé mal,

Yinkinyink fatigé,

Yinkinyink ti kèr i ral,

Yinkinyink tinn mon fanal !

Ton ti boush an transh papay,

Poul i kakay,

Ma pou ni fay,

Kiakiakiak fane shagrin,

Kiakiakiak pou d’vréman,

Kiakiakiak done lo grin,

Kiakiakiak an kontantman,

Kiakiakiak ri mon zanfan !

Ton ti boush i di pu ryin,

La nwit i vyin,

La…twé lé byin.

🎶 Ti dodo mon baba,

Ti dodo mon zarlor,

Ti dodo dan mon bra,

Ti dodo kanot dann bor,

Ti dodo monmon ton por…