FONNKÈR : "Mon lang kozé" de Karol

Retrouvez chaque samedi, un fonkézèr de l'île des poètes.
Réunion la 1ère •

MON LANG KOZÉ

La di pou mwin giny diplom fo mi aprann koz fransé
Pou mwin giny voyazé fo mi aprann koz anglé
Prèsk an kashièt an misouk pou pa demoun i koné
Ryink dan la kaz ou va giny bat ou lang kozé

Formaté par lékol sanm la sosyété
Mavé presk bliyé mon kisamilé
Falé pas dann malizé
Pou mwin konèt mavé bozwin twé

Lontan mwin la pèrd a mwin
Epi souvan mwin la tromp somin
Falé la fors gard lo kèr sinyé
Kan zétwal la dévir kanot mon déstiné
Ou fini par kashièt dèryèr sèk ou lé pa
Par oubli ousa ou sort é kisa i gid out bann pa

Alor pou mwin géri mwin la parti rod répons dann in ta liv fransé
Hugo, Molière, Verlaine, tout la pasé
Mé sé dann kozé domyèl Danièl, Treuthard, Honoré
Ké mwin la tasmanir sony mon kèr kontkonyé

Ryink a twé la giny démay mon kozé
Mont a mwin la vérité ousa i lé
E dan sak zafèr mi fé mi trouv a twé an domyélé
Parsk kan mi fé la priyèr sé an kréol
Kan mi plèr mi soupliny sé an kréol
Kan mi kri mon kolèr sé an kréol
E kan mi koz lamour sé ankor an kréol

Mé bana i vé pa vwar ou ni dann biro ni dann lékol
I di ou sé in lang batar ké ou dwa rèst dann fénwar
Né dann malizé lesklavaz
Bana si ou i vé nou tourn la paz

Mé zot la pa konpri
Oubli aou sé kom oubli Bondyé
Oubli ousa nou sort é kisa nou lé podvré
E si nout sentyé fénwarsité
Aou mèm i tyinbo nout nièlpou alimé

Alor vyin pa di a mwin ou sé in lang batar
Kan pou mwin ou sé in létandar
Sak mo ti kado a mwin
Sé in fanal si mon somin
E la limyèr ti fé farine si mwin
Sé in lespwar pou mon bann domin

E plis mi aprann konèt a twé
Plis mi koz sanm twé
Sé plis ké mi yèm a twé
Mon kréol mon lang kozé.
 
À la une
Voir plus d'info
Thématiques associées