FONNKÈR : "Na in zour va rivé" par Jordan. Texte de Gilberte Rougemont

NA IN ZOUR VA RIVÉ

Mwin in ti marmay le Port.

Le Port ou sak i fé sho

Ou sak nana in por

Ék in bon pé bato.

Bato na tout koulèr

Na lo ti,  na lo gro...

Bato na tout lodèr

É nadfwa, mon kèr lé gro.

Mèm mi vé pa, mon pyé

I aral  a mwin laba.

Mi  dobout   si lo ké

Mi bouz pi,  mi rès la.

Tout bato i ariv la

Mi rod ousa li sort.

Tout bato i sava

Mi vèy kosa li port...

Monmon i  di la mèr

Sa sé ryink traka.

A nou domoun la tèr

Na pwin lavnir èk sa !

Papa i di mon bann frèr

Vèy pou anpèsh a mwin

kos koté bann dokèr

kas la blag èk marin

Mi lès a zot kozé.

I fo lès la mèr bat.

Mwin tou sèl i koné

Pou kwé mon kèr i bat.

Gèt solèy tou lé swar

Li sa kachyèt dann lo.

Lo matin li ardémar

Pou fé shant ti zwazo.

In zour  li va lévé

San papyé, san valiz

Sar mon tour pou alé

Pou  vang dann kèr  la briz.

Ma di adyé  Le Port

Péi , nana a flo.

Dot zandrwa, dot por

Èk in bon pé bato. 

^{Texte de Marie Gilberte ROUGEMONT, dit par Jordan PAUSÉ}