FONNKÈR : "Parèy" de Marika

fonnker
Marika "Parèy"

PARÈY

25 désanm...8 èr d’matin....mwa krwaz out somin Ti Mil

Bana i voulé mi apèl la polis pou ou...

Ou té sou...ou voulé batay....ou té anfou

Nou la pri lo tan pou kozé ..kinm out soulézon..

Fonnkèr la pou tou lé Ti Mil’nou wa koté nou

 

A fors tangazé

Dann mon déviré

Sou mon vié lékors

A fors tangazé

Dann mon déviré

Mi trouv pi la fors

Parèy mwa pi anvi bataÿ ansanm la vi

Parèy lo kor an fatak si somin blaké

Mon gozié lé sèk telman mwa la fine krié

Mi di asé, arèt ek sa, larg mon lourlé

Parèy yièr la file an vitès près konm inn flès

Parèy mi rapèl pi poukosa mwa lé san

Fokrwar dopui promié zour té un vré foutan

Inn nésans san rézon san lamour san manman

A fors tangazé

Dann mon déviré

Sou mon vié lékors

A fors tangazé

Dann mon déviré

Mi trouv pi la fors

Dann lo ronmaranzé mwa la fine par trouvé

Tousak limanité la pa zamé doné

Sis mon fyèl, èg mon  fwa, dann mon syèl somin d’krak

Bwar la rak an moukat si piédbwa zanbalak

Angard pa mon linz an tiak tiak

Wa pa mwa dinn koljak

Si pat port la boutik lès mon vié kor kimé

Dann kwin mon bous izé lès in golwaz fimé

Ou wa pa ou lé konm mwa mé an plis méyèr

Mi rapèl pi kansa mwa la tinn mon féklèr

A fors tangazé

Dann mon déviré

Sou mon vié lékors

A fors tangazé

Dann mon déviré

Mi trouv pi la fors

 

Marika