FONNKÈR : "Poz ton ki ton kaz" de Éma

Réunion la 1ère •

POZ TON KI TON KAZ

Oté,
Poz ton ki ton kaz
Asé iz ton saliv koméraz voizinaz
Asé atiz ton per sanm la koler
Mazinn plito koman domin nou sa fer
Pars y fodra sanz nout manyer
Sinon not tout va rès ater !

Poz ton ki ton kaz
Boutik la boutik ton matant kosa ?
Ziskakan ti sa rak fonn réyon la ?
Konomiz ton manzé, asé gaspyé
Kan midi kari talèr risofé nora asé
Dori ek la sos defoi lé pa mové !

Poz ton ki ton kaz
Si na pi siro boir losukré
Pli meyer ankor dolo telkilé
Si na pi rézo rod manyer po okipé
Si ou rod byin ou va trouvé
Ou minm sar étoné sak ou kab invanté

Poz ton ki ton kaz
Fé pa lo kouyon, lo pli for, lo konésèr
Ou lé vulnérab asé fé Lo fyer
Profit lokazyon po tir la pousyèr
Pa ryink lakaz asèv lav loker
Démaliz Lo zié po war pli klèr

Poz ton ki ton kaz,
Portatansyon anatandan
Sou lonbraz out pié d’sézisman
In grinn konsyans y zerm dousman
Aroz a li, pa ryink dann konfinman
Kraz pa li domin dan pilon arkomansman

Poz ton ki ton kaz , dalon
Pran lo tan gard dann fon
Dann fon , kosa y kont vréman
Dann fon , kisa ou lé vréman
Alon sey ansanm èt rézilian !
Mé… poz ton ki ton kaz !
 
À la une
Voir plus d'info
Thématiques associées