réunion
info locale

FONNKÈR : "Santié" de Stéphane

fonnker
Stéphane Maillot
SANTIÉ

Dan somin  blaké galizé
Dan santié maronèr balizé
Mi anvoy in apré lot
Lo drwate ek lo gos
Pou sak nivo na son tèmpo
Pou sak tèmpo fo bwar dolo
Ti golo ti golo panga kout so
Oubli pa anpar koko ek sapo
Sinon kout solèy sa plis ton po

Amwin ti ga la kour
Mi mars mi kour
Pa pou larzan pou la glwar
Mé pou la kalité la kalouté, la risès,
La natir mon péï

Néna i ariv isi par zwazo an fèr
Na dot i ariv isi par la mèr
Amwin mwin lariv isi par, ma mèr é mon zénitèr

Ban domoune la i vizit ali, i éksplor ali
An lon an larz an travèr an otèr an profondèr
Anou dmoune isi nou fé ti zizite
Nou kontant ek pik pik

Dan fond la rivièr flèr zone
Mi pans riz zone
Mon vant i kri piton marmit
é si anchin i wa dé lwin
Milé an èkstaz devan trwa salaz
Santié skout in zour goût touzour

Lakot lé rèd parkour gran rèd

Mé pa de bèl blonde o pa de belkomb
Piton de bert dopin dobèr
Piton la fournèz sss so kom la brèz
A dodane mi balad a do, dane
Maïdo May pa mi dodo pa, sia
Mé ferm pa la fénèt lé mak
Ferm pa la fénèt lé mak dé silaos

La rénion ile intans

Pou war son boté
Fo mérité fo transpiré
Pou war son boté
Fo lèv bonèr avan la polision
I modifi out vizion

La rénion sa lé gayar sa lé mazik
Pouvwar son boté
Kap transform sitadin mokasin an avantirié
Pouvwar son boté kap fé tomb a twé amouré
Mé pangar, pangar bana,
Pouvwar son boté lé an trin fané

Alor mon ban alon done la min alon protèz Ali alon prézèrv ali

Paské pouvwar son boté lé an trin fané pouvwar son boté i fo, vréman, i fo vréman prézervé