FONNKÈR : "Sipèrstisyon" par Sultana. Texte de Gilberte Rougemont

SIPÈRSTISYON                                                  

Pase a ou Saint-Philippe, la Saline, Saint-André

Kiswa la kaz d' moun rish ou byin d’moun maléré

Nana dé trwa kozman dépi lantikité

Ziska komélala, i grèn lo mèm chaplé :

Rouv pa parasol la kan la kaz lé fèrmé

Panga dann la zourné, in batay va pété !

Kan si zèr la soné, i mèt pi la propté.

kéd’balèy la pousyèr, ou balèy la moné !

Manz mèm la krout do ri dann vyé marmit suyfé

le zour ou va maryé, la pli va dévidé.

Out zézèr, out dalon, moushwar  fo pa prété

Sinon tardra viyindra, zot dé sora fashé...

Ramas byin out dé pyé kan inn i pas balyé

Si la frol out soulyé, ou la pa préd  maryié !

In bébèt larzan la poz dann out shévé

Faroush pa son dégré, out fortine la rivé !

A fors antann partou lo mèm ladi lafé

Nana bon pé zafèr, ou tatone avann fé !

É kan mi d’mann monmon si tou sa lé sèryé

Sak èl i trouv pou di, i avans pa mwin bon pé :

«Mon zanfan,  i di sipèrstisyon, dot i di i fo méfyé

Mé ma fi, an prékosyon, fé konm sik lété vré ! »

Texte de Marie Gilberte ROUGEMONT, dit par Sultana ARIAN