réunion
info locale

FONNKÈR : "Vanina" de Élodie Lauret

fonnker
FonnkerEloLauret
Retrouvez chaque samedi, un fonkézèr de l'île des poètes.
VANINA

é si…
é si navé poin domin
si domin moin té pu la
kosa va ress de moin ?
in sourir, in regar, in lodèr, inn voix, in zimaj

é si…
é si navé poin domin
si domin moin té pu la
si domin ou té pu la
kosa va ress de ou ?
in Silans…

Zordi le sièl lé gri
Parey mon kèr fé noir
Mi rod dann sièl in zétoil i briy
Mé mon kèr i plèr asoir

In zour, ou va trouv soley
Soley éternel dann sièl
Mem si out kèr lé an somey
ou va briy an zétinsel…
Ou va alé…


Moin té yèm kan ou té souri
kan out zié té ékarkiy
é ke ot dé ti kanèt té briy
Moin té yèm aou ti fiy

In zour, ou va trouv soley
Soley éternel dann sièl
Mem si out kèr lé an somey
ou va briy an zétinsel…
Ou va alé… x2


Zordi moin lé an kolèr
Mon kor lé an doulèr
In morso mon kèr la parti
Sé mon zanfan ke la parti

Ou la tué mon fiy
Ou la rash son vi
mé mi gard la fors
Mi gard la fors pou sobat

Mèm kan soley la fine alé
Si la limièr la fine étinn
Mèm si le kèr lé fré
Toute koulèr, nou doi toujour pinn

Somanké si mi rouv mon zié
Ou va trouv soley ti fiy
Ou va trouv la vi
Somanké, ou va trouv osi lanvi
inn ti brin lamour, in paradi

In zour, ou va trouv soley
Soley éternel dann sièl
Mem si out kèr lé an somey
ou va briy an zétinsel…
Ou va alé… x2


Mèm kan la nuite lé noir
moin nora toujour in brin la limièr
ek inn ti zing léspoir
Pou féklèr nout kèr

 
Publicité